Latest News and Updates

पाकिस्तानमा चार आतंककारीलाई फाँसी :

वैशाख २१ । पाकिस्तानमा चारजना आतंककारीलाई बुधबार फासीको सजाय दिइएको छ ।

आतंकवादमा संलग्नता रहेको आरोपमा ती चार आतंककारीलाई फाँसी दिइएको पाकिस्तानी सैनिक स्रोतले जानकारी दिएको छ । सैनिकद्वारा प्रकाशित विज्ञप्तिकाअनुसार निर्दोष नागरिकमाथि आक्रमण र सशस्त्रबलमाथि आक्रमणजस्ता आतंककारी आक्रमणमा संलग्नता रहँदै आएको आरोपमा ती चार आतंककारीलाई फाँसी दिइएको छ । फाँसीका सजाय पाएका ती आतंककारी प्रतिबन्धित समूह तेहरिक ए तालिबान पाकिस्तानसँग आवद्ध रहेको जानकारी दिइएको छ ।

सन् २०१४ को डिसेम्बरमा पेसावरको एक सैनिक विद्यालयमा भएको भीषण आक्रमणपछि पाकिस्तानमा सैनिक अदालतको स्थापना भएको थियो । सैनिक विद्यालयमा भएको त्यस आक्रमणमा परी १३५ जना बालबालिकासहित १५० व्यक्तिको मृत्यु भएको थियो । त्यस भयानक आक्रमणपछि स्थापना भएको सैनिक अदालतले आतंककारीको पहिचान गरी फाँसीको सजाय दिने गरेको छ ।

गत मार्चमा पाकिस्तानी संसदले थप दुई वर्षको लागि सो सैनिक अदालतलाई अनुमोदन गरेको थियो । गत जनवरीमा नै त्यस अदालतको दुई वर्षको अवधि समाप्त भएको थियो ।


time Published on:  2017-05-03    | Read More




२२ केजी गाँजासहित तीनजना पक्राउ :

वैशाख २१ । विराटनगरको हाटखोलाबाट २२ केजी गाँजासहित प्रहरीले बुधबार तीनजनालाई पक्राउ गरेको छ । 

पक्राउ पर्नेहरुमा मोरङ, भाथिगछाका जितेन ठाकुर, ज्योतिषकुमार राजवंशी र तेजनारायण राजवंशी रहेका छन् ।

विराटनगर बजारबाट हाटखोलातर्फ जाँदै गर्दा उनीहरुलाई पक्राउ गरेको मोरङ प्रहरी प्रमुख सन्दिप भण्डारीले जानकारी दिए ।


time Published on:  2017-05-03    | Read More




३४ जिल्लाका २८३ स्थानीय तहमा ४१ हजार बढीको उम्मेदवारी :

वैशाख २१ । पहिलो चरणको स्थानीय तह निर्वाचनका लागि मंगलबार ४१ हजार बढी उम्मेदवारी दर्ता भएको छ ।

निर्वाचन आयोगले उम्मेदवारी दर्ताको सूची प्रकाशन गर्ने तयारी गर्दैगर्दा उम्मेदवारहरु भने प्रचार–प्रसारमा उत्रिन थालिसकेका छन् । तीन प्रदेशका २८३ स्थानीय तह निर्वाचनका लागि मंगलबार भएको उम्मेदवारी दर्तामा चुनावी उत्साह देखियो । प्रदेश नम्बर–३, ४ र ६ का ३४ जिल्लामा वैशाख ३१ गते हुने निर्वाचनबाट १३ हजार ५ सय ५६ जनप्रतिनिधि निर्वाचित हुँदैछन् ।

निर्वाचन आयोगकाअनुसार पहिलो चरणको निर्वाचनका लागि २८३ स्थानीय तहमा विभिन्न पदका लागि ४१ हजारभन्दा बढीको उम्मेदवारी परेको छ । केहि स्थानीय तहको विवरण आउन बाँकी छ । उम्मेदवारी दर्तामा देखिएको उत्साहले चुनावबारे उठाइएका आशंका पनि मेटाएको निर्वाचन आयोगले जनाएको छ ।

निर्वाचन आयोगले दिएको जानकारीअनुसार काठमाडौं महानगरपालिकाको मेयरका लागि विभिन्न राजनीतिक दल र स्वतन्त्र उम्मेदवार गरी २८, उपमेयरका लागि १३ जना, पोखरा महानगरको मेयर पदका लागि १७ जना र उपमेयरका लागि ११ जनाको उम्मेदवारी परेको छ । त्यस्तै, ललितपुर महानगरको मेयर पदका लागि १७ जना र उपमेयरका लागि १२ जना तथा भरतपुर महानगरको मेयरका लागि १५ जना र उपमेयरका लागि १२ जनाको उम्मेदवारी परेको छ ।

निर्वाचन आयोगकाअनुसार तीनओटा प्रदेशका चारओटा महानगरपालिका, एक उपमहानगर र ९२ ओटा नगरपालिकाका मेयर, उपमेयर तथा १८६ गाउँपालिकाका अध्यक्ष तथा उपाध्यक्ष पदका लागि मनोनयन दर्ता भएको छ । महानगरका १२३, उपमहानगरका १९, नगरपालिकाका १ हजार ९१ र गाउँपालिकाका १ हजार ३ सय ६५ गरी २ हजार ५ सय ९८ वडाध्यक्ष र १० हजार ३ सय ९२ वडासदस्य पदका लागि मनोनयन दर्ता भएको हो । २८३ तहमा २ हजार ५ सय ९८ वडा रहेका छन् ।

पहिलो चरणमा निर्वाचन हुने तीन प्रदेशमा मतदाता संख्या ४९ लाख ५६ हजार ९ सय २५ रहेको छ भने ६ हजार ६ सय ४२ मतदान केन्द्र तोकिएका छन् ।


time Published on:  2017-05-03    | Read More




कास्कीका चार गाउँपालिकामा करिब ७ सय उमेद्वार :

पोखरा २० वैशाख ।। कास्कीका चार गाउँपालिकामा करिब ७ सय जनाले उमेद्वारी दर्ता गराएका छन् । कास्कीका मादी, माछापुच्छ्रे, अन्नपूर्ण र रुपामा गाउँपालिकामा ६ सय ६९ जनाले उम्मेदवारी मनोनयन गराएका निर्वाचन अधिकृतहरुले जनाएका छन् । 

मादी गाउँपालिकामा अध्यक्षका लागि पाँच र उपाध्यक्षका लागि तीन जनाको उम्मेदवारी परेको छ । अध्यक्षमा नेपाली काँग्रेसका देवीजंग गुरुङ, एमालेका बेद बहादुर गुरुङ (श्याम), माओबादी केन्द्रकी राधा सापकोटा, परिवार दलकी नन्दकली भण्डारी र संघीय समाजबादी फोरम तथा नयाँ शक्तीको संयुक्त गठबन्धनबाट रामकाजी चर्माकारले उम्मेदवारी दिएका छन् । यस्तै उपाध्यक्षमा काँग्रेसबाट प्रभाश्री गुरुङ, एमालेबाट बिष्णुमाया आचार्य पौडेल र माओबादी केन्द्रबाट नन्दश्री गुरुङले उम्मेदवारी प्रश्तुत गरेका निर्वाचन अधिकृत गुरुदत्त ढकालले जानकारी दिए । मादी गाउँपालिकामा ५ वटा दल र स्वतन्त्र गरी १ सय ६९ जनाले उम्मेदवारी बुझाएका छन् । मादीको वडा नम्बर ७ को वडाध्यक्षमा स्वतन्त्र उम्मेदवारी परेको ढकालले बताए । १२ वटा वडा रहेको मादीमा ६२ जना निर्वाचित हुनेछन् । १३ हजार ५ सय ५९ मतदाता रहेको यस गाउँपालिकामा १७ मतदान स्थल र २२ मतदान केन्द्र कायम गरिएको छ । चुनाव पछि दलित तथा अल्पसंख्यक समुदायबाट थप दुई जना चयन गरेर गाउँसभा गठन हुनेछ भने २० जनाको गाउँकार्यपालिका बन्नेछ । माछापुच्छ्रे गाउँपालिकाको अध्यक्षमा ८ जनाको उम्मेदवारी परेको छ । नेपाली काँग्रेसका खुशीमान गुरुङ, एमालेबाट कर्णबहादुर गुरुङ, माओबादी केन्द्रबाट प्रविणा अधिकारी, नयाँ शक्ती पार्टीका तोयानाथ लम्साल, राष्ट्रिय जनमोर्चाका अर्जुन कार्की, अखण्ड नेपाल पार्टीका राम बहादुर घर्ति, राप्रपाबाट पूर्ण बहादुर गुरुङ र स्वतन्त्र रुपमा भीम बहादुर गुरुङले उम्मेदवारी अध्यक्षमा उम्मेदवारी प्रश्तुत गरेका हुन् । 

स्वतन्त्र भनिएका गुरुङ काँग्रेसका बागी उम्मेदवार हुन् । उनी नेपाली काँग्रेसका साविकमाछापुच्छ्रे इकाई सभापति हुन् । यस्तै उपाध्यक्षमा नेपाली काँग्रेसकी टेकनशोभा गुरुङ, एमालेकी कृष्ण कुमारी पौडेल दवाडी, माओबादी केन्द्रका टेकनाथ गौतम, राप्रपाकी कुन्ती गुरुङ, नयाँ शक्ती नेपालबाट सुजिता गुरुङ, अखण्ड नेपालकी गंगा घर्तिले उम्मेदवारी दर्ता गराएका निर्वाचन अधिकृत गंगाप्रसाद पौडेलले जानकारी दिए । ९ वडा रहेको माछापुच्छ्रेमा अध्यक्ष र उपाध्यक्ष सहि

त ४७ जना निर्वाचित हुनेछन् । ४९ जनाको गाउँसभा हुने यस गाउँपालिकामा दुईजना दलित तथा अल्पसंख्यक समुदायबाट पछि निर्वाचित गराईनेछ भने १७ जनाको कार्यपालिका गठन गरिने छ । १६ हजार ३ सय १ जनाले १२ मतदान स्थल र २१ मतदान केन्द्रबाट मतदान गर्न पाउने छन् । माछापुच्छ्रेमा ७ दल र स्वतन्त्र सहित अध्यक्षमा ८, उपाध्यक्षमा ६, वडा अध्यक्षमा ४०, महिला सदस्यमा ३३, दलित महिला सदस्यमा ३० र खुल्ला सदस्यमा ७२ गरी १ सय ८९ जनाको उम्मेदवारी परेको निर्वाचन अधिकृत पौडेलले बताए । अन्नपूर्ण गाउँपालिकामा ७ जनाले अध्यक्ष र ५ जनाले उपाध्यक्षमा उम्मेदवारी दिएका छन् ।

अध्यक्षमा नेपाली काँग्रेसका युवराज कुवँर, नेकपा एमालेका बिष्णु बहादुर केसी, माओबादी केन्द्रका धर्म गुरुङ, राप्रपाबाट तुल बहादुर गुरुङ, परिवार दलबाट बिराट सुवेदी, नयाँ शक्तीबाट कर्ण बहादुर नेपाली र गोपाल गुरुङले स्वतन्त्र रुपमा उम्मेदवारी दिएका छन् । स्वतन्त्र भनिएका गोपाल नेपाल विद्यार्थी संघका केन्द्रिय सदस्य हुन् । उपाध्यक्षमा काँग्रेसबाट खीम कुमारी गुरुङ, एमालेबाट सगुन गुरुङ, माओबादी केन्द्रबाट हरिमाया तिमिल्सीना अधिकारी, नयाँ शक्तिबाट लक्ष्मी दाहाल र राप्रपाबाट बिनकुमारी अधिकारीको उम्मेदवारी परेको निर्वाचन अधिकृत योगनाथ ढकालले जानकारी दिए । उनका अनुसार ६ वटा राजनीतिक पार्टीबाट वडाअध्यक्ष, महिला सदस्य, दलित महिला सदस्य र खुल्ला सदस्यमा १ सय ९९ जनाले उम्मेदवारी दर्ता गराए । ११ वडा रहेको अन्नपूर्णमा ५७ जना निर्वाचित हुनेछन् भने १९ जनाको कार्यपालिका बन्नेछ । १५ हजार ५ सय ६७ जना मतदाता रहेको यो गाउँपालिकामा १५ मतदान स्थल र २१ मतदान केन्द्र कायम गरिएको छ । रुपा गाउँपालिकामा ७ जना अध्यक्ष र ४ जनाले उपाध्यक्षका लागि उम्मेदवारी दिएका छन् । 

अध्यक्षमा नेपाली काँग्रेसका प्रकाशमोहन खनाल, एमालेका नवराज ओझा, माओबादी केन्द्रकी निर्मला सुवेदी, नयाँ शक्तीका नारायण सुवेदी, राष्ट्रिय जनमोर्चाका ऐन बहादुर बसौला, राप्रपाका इन्द्र बहादुर माल र नेपाल परिवार दलका शिवजी भट्टराईले मनोनयन दर्ता गराएका छन् । उपाध्यक्ष काँग्रेसकी गिमाया गुरुङ, एमालेकी लालसुब्बा गुरुङ, माओबादी केन्द्रका पुष्पराज खनाल र राप्रपाकी फललक्ष्मी देवी शाही उम्मेदवार बनेका छन् । 

गाउँपालिकाको अध्यक्ष, उपाध्यक्ष, वडा अध्यक्ष र सदस्यहरु सहित ७ वटा राजनीतिक पार्टीबाट १ सय १२ जनाको उम्मेदवारी परेको निर्वाचन अधिकृत लेखनाथ शर्माले जानकारी दिए । ११ हजार ३ सय १५ जना मतदाताले अध्यक्ष र उपाध्यक्ष सहित ३७ जनालाई मतदान गर्नेछन् । त्यसपछि दलित तथा अल्पसंख्यक समुदायबाट थप दुई जनालाई चयन गरेर गाउँसभालाई पूर्ण बनाईनेछ । ७ वडा रहेको रुपामा १७ जनाको गाउँकार्यपालिका गठन हुनेछ । यो गाउँपालिकामा ८ मतदान स्थल र १५ मतदान केन्द्र कायम गरिएको निर्वाचन कार्यालयले जनाएको छ ।


time Published on:  2017-05-02    | Read More




निर्वाचन सुरक्षाका लागि अर्थ मन्त्रालयद्वारा साढे सात अर्ब निकासा :

काठमाडौं, वैशाख २० । आगामी वैशाख ३१ र जेठ ३१ गते हुने स्थानीय निकायको निर्वाचनको सुरक्षाका लागि मात्रै साढे ७ अर्ब रुपैयाँ बजेट निकासा भएको छ । यसमध्ये अधिकांश रकम म्यादी, जनपथ र सशस्त्र प्रहरी परिचालन र आवश्यक सुरक्षाका लागि गृहमन्त्रालयलाई निकासा गरिएको छ । 

निर्वाचनका लागि गएको सुरक्षाअन्तर्गत म्यादी प्रहरीको तलव, पोसाक, राशन भत्तामा बढी रकम खर्च गर्नेगरी उक्त बजेट निकासा दिएको हो ।

यसबाहेक अर्थ मन्त्रालयले स्थानीय निकायको चुनावका लागि निर्वाचन आयोगलाई १० अर्ब २९ करोड रुपैयाँ निकासा दिइसकेको छ ।


time Published on:  2017-05-02    | Read More




सिरियाको शरणार्थी शिविरमा आईएसद्वार आक्रमण, ३० जना मारिए :

बैशाख,२० । इराकसँग सिमा जोडिएको सिरियाको शद्धादी नगर नजिकको शरणार्थी शिविरमा इस्लामिक अतिवादी समुह आईएसका लडाकुले आक्रमण गर्दा ३० भन्दा बढीको मृत्यु भएको छ ।मारिनेमा सर्वसाधारण र कुर्द लडाकु रहेको बताइएको छ । 

सिरियाली र इराकी शरणार्थीको अस्थायी शिविरमा कम्तिमा ५ जना आत्मघातीले आक्रमण गरेका थिए । बम आक्रमण र त्यसपछिको भिडन्तमा ३४ भन्दा बढी घाईते भएका छन् । घाइते कयौंको अवस्था गम्भीर छ ।

आक्रमणपछि नजिकैको चेकपोष्टमा रहेका सिरियन डेमाक्रेटिक फोर्सका सेनासँग लडाकुको भीडन्त भएको थियो । लडाकुहरुले आक्रमणपछि थुप्रैलाई अपहरणसमेत गरेका छन् ।


time Published on:  2017-05-02    | Read More




Featured | Useful Links

Educational, informative and entertainment activities are regularly on AIR in Radio Apostle

Live Streaming

Winamp, iTunes Windows Media Player Real Player QuickTime
1st one for PC users & 2nd Red for smaller Devices

Contact Us

     Radio Apsotle 102.6 MHz                                Bagar, Pokhara-1, Kaski, Nepal .

Address: Block 17, Nayagalli, Pokhara
Telephone: +977-061-521978
                         +977-061-550506
E-mail: radioapostle@gmail.com
Url: www.radioapostle.com.np