Latest News and Updates

ट्रकको ठक्करबाट एकको मृत्यु ,दुई घाइते  :

८ भदौ, चितवन। भरतपुरको आँपटारीबाट केन्द्रीय बस टर्मिनलतर्फ आउँदै गरेको ना ६ ख ३४२५ नम्बरको ट्रकले गणेशस्थान चोकमा बाटो काट्दै गरेको ना ३ प ७२३९ नंको मोटरसाइकललाई बिहीबार ठक्कर दिँदा मोटरसाइकलमा सवार तीन जना मध्ये एक जनाको मृत्यु भएको छ भने दुईजना घाइते भएका छन् ।

जिल्ला प्रहरी कार्यालय चितवनले दिएको जानकारीअनुसार ट्रकको ठक्करबाट गम्भीर घाइते हुनुभएकी मोटरसाइकलको पछाडि सवार भरतपुर महानगरपालिका-११ की ४२ वर्षीया आशमाया थापाको मृत्यु भएको हो ।

मोटरसाइकल चालक उनका श्रीमान् ४६ वर्षीय मानबहादुर थापाको अवस्था गम्भीर रहेको छ । मोटरसाइकल पछाडि सवार सोही ठाउँकी ४५ वर्षीया सानुमाया बुढाथोकी सामान्य घाइते भएकी छन् ।

घाइते दुवैको कलेज अफ मेडिकल साइन्सेस भरतपुरमा उपचार भइरहेको प्रहरीले जनाएको छ । ट्रक र त्यसका चालकलाई प्रहरीले नियन्त्रणमा लिएको छ ।


time Published on:  2017-08-24    | Read More




चितुवाको आक्रमणबाट महिला घाइते :

डडेल्धुरा, भदौ ८ । बैतडीको बिशालपुरमा चितुवा आक्रमणबाट महिला घाइते भएकी छन् । बिहीबार बिहान ९ बजे मैलौली नगरपालिका वडा नं ९ की ४० वर्षीय कुन्दा देवी भट्ट चितुवाको आक्रमणमा परि घाईते भएको स्थानीय जनप्रतिनिधि भीमदत्त भट्टले जानकारी दिएका छन् ।

आफ्नै खरबारीमा घाँस काटिरहेको अवस्थामा उनलाई चितुवाले आक्रमण गरेको बताइएको छ ।

चितुवाको आक्रमणमा परि बैतडीमामात्र २२ जनाले आफ्नो ज्यान गुमाइसकेका छन् भने कयौं घाइते भइसकेका छन् ।

घाइते भट्टलाई उपचारका लागि बैतडीस्थित जिल्ला अस्पताल लैजाने तयारी भइरहेको छ ।

उनको हात र नाकमा चोट लागेको छ ।


time Published on:  2017-08-24    | Read More




अदुवा निकासी ठप्प हुँदा व्यापारी र किसान चिन्तित :

सुनसरी, भदौ ८ । भारतमा बस्तु तथा सेवा कर (जिएसटी) लागू भएपछि नेपालको अदुवा निकासी ठप्प हुँदा अदुवा व्यापारी र किसान चिन्तित बनेका छन् । १५ दिनदेखि अदुवा भारत निकासी हुन नसकेपछि बारीमै कुहिन लागेको भन्दै किसान चिन्तित बनेका हुन् ।

पूर्वी पहाडी जिल्लामा उत्पादन भएका अदुवाको मुख्य बजार नै भारत हो । ९० प्रतिशत अदुवा भारतका विभिन्न शहरमा निर्यात हुने गरेको छ । जेठदेखि असोजसम्म माउ अदुवाको मुख्य सिजन हो । तर, १५ दिनयता अदुवा पैठारी ठप्प छ । बजारमा हालसम्म २० प्रतिशत अदुवामात्रै गएको र ८० प्रतिशत किसानकै बारीमा भएकाले चाँडै भन्सार नखुले कुहिएर खेर जाने व्यापारी बताउँछन् ।

भारत सरकारले लागू गरेको नयाँ प्रणालीका कारण भारतीय व्यापारीले नेपालबाट अदुवा लैजान नमानेको कृषि उपज बजारस्थल सञ्चालक समितिका अध्यक्ष काजी गिरीले जानकारी दिए । अहिले धरान–१३ स्थित कृषि उपज बजारस्थलमा १२ गाडी अदुवा जाम भएर बसेको छ ।

अदुवा भारत निर्यात नभए नेपाली अदुवा उत्पादक किसान ठूलो नोक्सानमा पर्ने देखिएको छ ।


time Published on:  2017-08-24    | Read More




सशस्त्र प्रहरी जवान मृत फेला, शव नजिकै छुरा भेटिएकाले हत्याको आशंका  :

भदौ ८ । राजश्व तथा भन्सार अनुसन्धान गुल्म कञ्चनपुर गड्डाचौकीमा कार्यरत सशस्त्र प्रहरीका जवान नरेन्द्र कुँवर मृत अवस्थामा फेला परेका छन् ।

भीमदत्त नगरपालिका–३ तिलकपुर स्थायी घर भएका २५ वर्षीय कुँवर काम सकेर बुधबार साँझ घर फर्किएका थिए ।

भिमदत्त नगरपालिका–६ ऐठपुर नजिकै सडकबाट केही तल बिहीबार बिहान उनको शव फेला परेको राजश्व तथा भन्सार अनुसन्धान गुल्म कञ्चनपुर गड्डाचौकीका प्रमुख सशस्त्र प्रहरी नायब उपरीक्षक प्रेम पाण्डेले जानकारी दिए ।

कुँवरले चढ्दै आएको म २ प ६२३ नम्बरको मोटरसाइकसमेत घटनास्थल नजिकै फेला परेको छ । प्रहरीले घटनास्थलबाट एउटा छुरासमेत फेला पारेको छ । घटनाबारे थप अनुसन्धान भईरहेको प्रहरीले जनाएको छ ।


time Published on:  2017-08-24    | Read More




पहिरो प्रभावित फालेलुङका परिवारलाई प्रभावित क्षेत्रमै गएर राहत प्रदान  :

पाँचथर, भदौ ८ । पाँचथरको फालेलुङ गाउँपालिका वडा नम्बर ३ का पहिरोबाट विस्थापित १ सय १४ परिवारलाई प्रभावित क्षेत्रमै पुगेर राहत रकम प्रदान गरिएको छ ।

बुधबार केन्द्रीय दैविक प्रकोप राहात समितिबाट आएको २१ सय प्रतिब्यक्तिका दरले २ सय २ जना ब्यक्तिलाई राहत प्रदान गरिएको जिल्ला दैविक प्रकोप राहत समिति तथा प्रमुख जिल्ला अधिकारी विनोद कुमार खड्काले जानकारी दिए । यस्तै जिल्ला दैविक प्रकोप उद्धार समितिको तर्फबाट प्रतिपरिवार ३० केजीको चामालको बोरा, ३ केजी दाल, २ लिटर तेल, २ पोका आयो नुनका दरले २ लाख ४८ हजार ५ सयका दरले राहत सामाग्री वितरण गरिएको उनले बताए ।

यस्तै नेपाल रेडक्रस सोसाइटी जिल्ला शाखा पाँचथरले भाडाबर्तनको सेट, कमल २ वटा, बाल्टी, डोरी, १ केजी दर भुजा र चिउरा, ३ प्यागेट चाउचाउका दरले १ सय १४ परिवारलाई राहत सामाग्री वितरण गरिएको शाखाका सभापति कृष्णप्रसाद बाँस्कोटाले बताए । यसअघि पनि रेडक्रसले १५ परिवारलाई खाद्यान्न सामाग्री र ४८ परिवारलाई त्रिपाल वितरण गरेको थियो ।

यस्तै पहिरोमा परेर मृत्यु भएका विष्णुभक्त राईको नातिनी प्रियाको परिवारलाई २ लाख रुपैयाँ र पहिरोले किचेर मृत्यु भएका फालेलुङ गाउँपालिका वडा नम्बर १ का त्रिलोचन विकको परिवारलाई २ लाख रुपैयाँ राहत रकम प्रदान गरिसकिएको जिल्ला दैविक प्रकोप उद्धार समितिले जनाएको छ । पहिरोमा परेर बेपत्ता भएका विष्णुभक्त र उनकी छोरी गंगाको भने अहिलेसम्म शव भेटन सकिएको छैन ।

पहिरोमा परेर त्यस वडाको खोलाघारी, खोलागाउँ, ताङलेपा, माङलेबुङका विस्थापित परिवारहरु अहिले छिमेकीको घरमा त कोही विद्यालयको प्रांगणमा शरण लिएर बस्न बाध्य छन् ।


time Published on:  2017-08-24    | Read More




स्वाइनफ्लुको हल्लाका कारण पोखराका बंगुर ब्यवशायनै धरापमा :

पोखरा, ५ भदौ । स्वाइनफ्लुको हल्लाले बंगुर ब्यवशायनै धरापमा परेका छन । स्वाइनफ्लु रोग बंगुरबाट मानिसमा सर्ने भ्रम फैलिएपछि कास्कीमा बंगुर ब्यवशाय सञ्चालन गरेर जिविकोपार्जन गर्ने किसान हरु ब्यशायबाटै पलायन हुने स्थितीमा पुगेका छन । 

मौसमी रुघाखोकीका कारण मानिसहरु बिरामी हुने र बिरामीको मृत्युका खबरहरु सञ्चारमाध्याममा स्वाइनफ्लु भनी प्रचार प्रसार गर्दा बंगुर ब्यवशायी किसानहरु मर्कामा परेका हुन । प्रतिदिन २५ सय केजी बंगुरको मासु बिक्री भइरहदा तीन हप्तादेखि स्वाइनफ्लुको हल्लाका कारण बंगुरको मासु बिक्री हुन छोड्दा किसानहरु मर्कामा परेको बंगुर बृडर कृषक सहकारी संस्था पोखराका अध्यक्ष योग बहादुर आचार्यले वताए ।

कास्कीमा ११३ वटा बंगुर फर्म रहेको र फर्ममा रहेका बंगुर र कामदारहरुमा मौसमी रुघाखोकी नदेखिएको र मौसमी रुघाखोकीलाई स्वाइनफ्लु भनेर हल्ला फैल्याउदा ब्यवशायनै ठप्प हुन पुगेको आचार्यले वताए । हाल पोखरामा बंगुरको मासु बिक्री गर्ने दुइ दर्जन फ्रेस हाउस पनि बन्द अवस्थामा रहेको आचार्यले वताए ।

जिल्ला पशु सेवा कार्यालय कास्कीका प्रमुख डाक्टर पुरुषोत्तम त्रिपाठीले कास्कीमा रहेका बंगुरमा मात्र नभइ हाल सम्म संसारमा कुनैपनी बंगुरमा स्वाइनफ्लु रोग नलागेको वताए । स्वाइन फ्लु रोग हाल सम्म बंगुरमा कहीपनि नभेटिएकाले विभिन्न सञ्चारमाध्याममा स्वाइनफ्लुको कारण बंगुर भनी प्रचार प्रसार गरिनु गलत भएको वताए ।

यस्ता समाचारहरुले बंगुर ब्यवशायनै धरापमा पार्ने काम भएकाले यस्ता विषयमा समाचारहरु सम्प्रेशण गर्दा बुझेरमात्र गर्नुपर्नेमा जोड दिए । त्यस्तै बंगुर ब्यवशायी संघका केन्द्रिय अध्यक्ष उमेश राइले बंगुर फर्ममा काम गर्ने र बंगुरको मासु खाएकै कारण कोही पनि मौसमी रुघाखोकीका कारण मृत्यु नभएको वताए ।

नेपाल अधिराज्य भरि मौसमी रुघाखोकीका कारण मानिसहरुको मृत्यु भइरहदा आफ्नो संस्थाले गरेको अनुसन्धानका क्रममा कोही कसैको पनि बंगुरको मासु खाएकै भरमा विरामी नपरेको पाइएको राइको भनाइ रहेको छ ।


time Published on:  2017-08-21    | Read More




Featured | Useful Links

Educational, informative and entertainment activities are regularly on AIR in Radio Apostle

Live Streaming

Winamp, iTunes Windows Media Player Real Player QuickTime
1st one for PC users & 2nd Red for smaller Devices

Contact Us

     Radio Apsotle 102.6 MHz                                Bagar, Pokhara-1, Kaski, Nepal .

Address: Block 17, Nayagalli, Pokhara
Telephone: +977-061-521978
                         +977-061-550506
E-mail: radioapostle@gmail.com
Url: www.radioapostle.com.np